بسم الله الرحمن الرحيم

الحقيقة أنا أحب إن أنا أهني موقع بص وطل بعيد ميلاده الرابع لأن الحقيقة ده موقع ممتاز الحقيقة بيشمل على متنوعات كبيرة جداً تهم كل الأعمار، منوعات ثقافية، ومنوعات علمية وترفيهية وحاجات الحقيقة جميلة، موقع الواحد دايماً يحب إن هو يتصفحه كله.

أنا الحقيقة دكتور بهجت مطاوع أحد المشاركين في الرد على بعض الأسئلة بالذات في موضوع الصحة الحنسية، الحقيقة الصحة الجنسية بتهم ناس كتيرة جداً، خصوصاً من الشباب الصغير أو اللي هو حتى في الأعمار المختلفة ممكن قوي يبقى عنده مشكلات، هو شايفها مشكلات كبيرة قوي، إنما هي مجرد المعرفة الصحيحة عن الثقافة الجنسية بتحلها كلها؛ لأن الجنس ده أحد الغرائز الأساسية اللي كل واحد ما بيقدرش يستغنى عنه، وهو فيه "تابوه" أو تغمية عليه في المجتمع، بحيث إن ما حدش عارف يسأل مين، يعني يسأل الوالد ولا الوالدة ولا يسأل المدرس ولا يسأل الشيخ ولا يسأل مين الحقيقة ده "تالانت" ضروري نعلمه إن الناس المسئولين عن تربية الشباب، لأن في السن الصغير ليه طريقة إنك تتكلم معاه، وسن بعد كده عند بداية أو قرب البلوغ ضروري نعلم الشاب بعض المعلومات التشريحية والوظيفية عن جسمه، وكذلك الشابة أو البنت أو الولد، وإيه التغييرات اللي بتتم وإزاي الهرمونات بتزيد، وإزاي الرغبة الجنسية بتييجي، وإزاي نقدر نتحكم فيها، وإيه الأضرار اللي ممكن تحصل عنها، إيه الحاجات اللي ممكن الجنس الخاطئ تنتقل إليه؛ زي الأمراض التناسلية المعدية، والخصوبة، يعني إيه بالنسبة للشباب، وإيه الحاجات اللي بتضر الخصوبة، إيه الحاجات اللي بتضر القدرة الجنسية الحقيقة.

الشباب بتبقى عنده كمية كبيرة جداً من الأسئلة وإحنا شفنا في خلال الأربع سنين كمية ضخمة جداً من الأسئلة ساعات الواحد يفتكرها إنها أسئلة يعني سهلة جداً أو معروفة، إنما الناس بتكررها كتير جداً، وعشان كده يجب إن إحنا نرد عليهم باستمرار، ونشوف الحاجات اللي هي قلقاهم ونوضحها لهم؛ لأن مجرد التوضيح الحقيقة بيخفف حوالي 90% من المشاكل لأن المشاكل الموجودة اللي فيها بتبقى نادرة جداً، إلا إذا كان فيها أمراض موجودة بالذات، زي السكر وزي التدخين وزي الإدمان والكلام ده كله، وده بنوضح حتى إزاي إن إحنا بنقدر نوقف الحاجات دي عشان ما ينضرش منها الشباب.

الحقيقة الموقع ده أنا شايف إن هو أنا كنت فاكر إن هيبقى مرتين تلاتة كده ونغطي الموضوع لقينا إن باستمرار فيه إقبال من الشباب من الجنسين ومن ناس حتى كبار في السن بيسألوا عن مواضيع كلها تهمهم، إحنا بنحاول على قد الإمكان إن إحنا ندي المعلومة الصحية والسليمة والسهلة وإزاي تتفهم بالنسبة لواحد ما هواش في المجال الطبي، ونأمل إن إحنا نكون بنؤدي خدمة للشباب.

وكل سنة وأنتم طيبين ..............

دكتور/ بهجت مطاوع
أستاذ ورئيس قسم أمراض الذكورة والعقم بكلية طب القصر العيني
ورئيس الجمعية المصرية لأمراض الذكورة