موضوعات سابقة
ارسل الموضوع لصديقنها كامل
يا ترى نفسك تخسي..!! ومش عارفة تبدأي ازاي؟...!! أو مترددة وقلقانة تروحي لدكتور يحرمك من "الشيكولاته" و"البيتزا" و"الشيبسي" و"البيبسي" وكل اللي نفسك فيه..!! وزنك زاد ومش عارفة تلبسي حاجة تناسب سنك..!! بتنهجي وانت ماشية أو لما تطلعي سلم..!! يا ترى جربتي أكتر من ريجيم والحكاية برضه مش نافعة..! يا ترى بعد عذاب الريجيم والحرمان رجعت "ريمة لعادتها القديمة" واللي خسيتيه في شهور رجعتيه وأكتر في أسبوعين..!!
أسئلة كتيرة ومشاكل أكتر بتواجهنا
لما بنقرر نعمل "ريجيم"..!
وعشان نبدأ "صح" و"بجد"
كان من المهم إننا نستضيف
الدكتور "محمد أبو الغيط"
الأستاذ بكلية الطب جامعة القاهرة
وسكرتير عام الجمعية المصرية
الطبية لدراسة السمنة..
والمنضم حديثا إلى فريق "بص وطل"
ليرد على أسئلة قرائنا الأعزاء
وهانرفع معاه شعار
"اخسر وزنك تكسب صحتك"..
أنا كان وزني 118 كيلو، وطولي 175 وعمري 26 سنة مع بداية السنة قررت أخسر وزني عشان أكسب صحتي.. وفعلا خسّيت 21 كيلو ووزني الحالي 97 كيلو بس مع الأسف من شهر ووزني ثابت عند الرقم ده.... نفسي أخس وخايفة أرجع لوزني السابق.. أنا حالياً مقلّة في النشويات جدّاً وملتزمة بساعة رياضة يومياً، الفطار واحد توست مع بيضة أو كورن فليكس، وفي الغداء سلطة وبروتينات مشوية أو مسلوقة، وفي العشاء زبادي أو ثمرتين فاكهة.. كل ده ومفيش فايدة بدأت أشعر بإحباط وبدأت ألخبط في الأكل أرجوك يا دكتور ساعدني بجد خايفة أرجع تاني ونفسي أخس وأكمل المشوار...
سماح...
"سماح" إنتِ مجتهدة وعندك إرادة بدليل إنك فعلاً قررتِ في الوقت المناسب إنقاذ صحتك أرجو منك أن تواصلي المشوار وافتكري التعب والمجهود اللي بذلتيه، بصي لنفسك في المراية وافتكري شكلك كان عامل إزاي افتكري وإنت بتطلعي السلم وإنت بتنهجي أكيد فيه فرق بين "سماح" اللي كان وزنها 118 كيلو و"سماح" النهارده ومشكلتك إن وزنك ثابت رغم التزامك...
بعض الناس تتبع نظام ريجيم واحد لمدة طويلة متخيلة إنه صح أو متبعة نظام في الأكل مرتاحة عليه وفي هذا النظام لخبطة وهو لا يعرفها وبيكررها طول الوقت فالوزن بيثبت عند رقم معين ولا يتحرك أو قد يزيد وزن المريض رغم الالتزام... والحل: التأكد أن النظام المتبع صح وثانيا تسجيل كل حاجة بناكلها -حتى الشاي والقهوة أي حاجة بتدخل المعدة- في جدول لمدة أسبوع وعرضها على متخصص عشان يقدر يحدد فين اللخبطة بالتحديد.
لو استمر الوزن ثابت نلجأ إلى مساعدة الجسم بالدواء يسرّع عملية الحرق التي تختلف من شخص لآخر فيه ناس تأكل كل حاجة ومش بتتخن وناس تانية أي لخبطة في الأكل تتخنها.
لو بعد الالتزام والدواء المشكلة مستمرة ممكن نجري تحليل هرمونات لأن قد يكون هناك لخبطة في الهرمونات أو فيه مشكلة ما تسبب زيادة الوزن أو تمنع إنقاص الوزن.
عندي مشكلة في موضوع الرياضة؛ لأن مش سهل إني أنزل واتمشى في الشارع عشان مع الأسف أصبح مكاناً غير مناسب لأسباب لا داعي لذكرها الكل يعرفها.. إيه البديل وخاصة إن الجيم قد لا يناسب مقدرة البعض ماديا؟ وهل صحيح ممكن الرياضة تزود الوزن مع الريجيم؟.. نفسي أعرف..!!
مروة
أي رياضة متاحة ومتوفرة بسهولة بتساعد الريجيم ولكن لازم ننتبه لحاجة مهمة جدّاً لو أنا عاوز أحقق رقم على الميزان أبعد عن الرياضات اللي ممكن تربي عضلات أو بتبني الجسم بشكل معين. فيه شباب بيلعبوا جيم عشان يظبّطوا شكل جسمهم وهذا هو الهدف الأساسي؛ ففي هذه الحالة الوزن على الميزان قد يزيد حسب نوع الرياضة أو الأحمال التي يتدرب عليها لكن لو المهم تحريك مؤشر الميزان وتقليله لازم نمارس رياضة زي المشي ولو غير متاح نطلع السلم أو ركوب العجلة أو السباحة لو متاحة أو لو إحنا مش قادرين وقاعدين على المكتب طول النهار في بعض الأجهزة الخفيفة المطاطة "سوست الضغط" التي يمكن الإمساك بها في اليد والضغط عليها دي بتحرق سعرات حرارية. كل مجهود بيقوم بيه الإنسان بيحرق سعرات حرارية حتى المجهود الذهني –وإن كان سعرات قليلة- هضم الأكل في حد ذاته بيساعد على حرق السعرات الحرارية.
أي رياضة مسموح بها حسب إمكانيات كل واحد...
كيلو الدهون= 7000 سعر حراري ويحتاج إلى 7 ساعات رياضة لحرقها... تخيلوا وجبة كومبو ممكن ناكلها في 7 دقائق محتاجة لنفس عدد الساعات من الرياضة لحرقها ومنع تحولها إلى دهون في الجسم!!!
من المعلومات المفيده في مجال الرياضة إن 3 ساعات رياضة في الأسبوع تطول من عمر الانسان من 2 إلى 3 سنوات.
موضوعات سابقة
:: أشعر بدوخة وعندي ألم في المعدة.. هل بسبب الريجيم؟!
:: ازاي أثبت وزني... ليه بارجع اتخن من الأول؟!!
:: جراحات السمنة:: أدوية الريجيم.. أرجوك لا تأخذ هذا الدواء.....!!!!
:: احسب وزنك بطريقة سهلة وقرر... "بس بسرعة"..!!
