موضوعات سابقة
ارسل الموضوع لصديقنها كامل
يا ترى نفسك تخسي..!! ومش عارفة تبدأي ازاي؟...!! أو مترددة وقلقانة تروحي لدكتور يحرمك من "الشيكولاتة" و"البيتزا" و"الشيبسي" و"البيبسي" وكل اللي نفسك فيه..!! وزنك زاد ومش عارفة تلبسي حاجة تناسب سنك..!! بتنهجي وانت ماشية أو لما تطلعي سلم..!! يا ترى جربتي أكتر من ريجيم والحكاية برضه مش نافعة..! يا ترى بعد عذاب الريجيم والحرمان رجعت "ريمة لعادتها القديمة" واللي خسيتيه في شهور رجعتيه وأكتر في أسبوعين..!!
أسئلة كتيرة ومشاكل أكتر بتواجهنا
لما بنقرر نعمل "ريجيم"..!
وعشان نبدأ "صح" و"بجد"
كان من المهم إننا نستضيف
الدكتور "محمد أبو الغيط"
الأستاذ بكلية الطب جامعة القاهرة
وسكرتير عام الجمعية المصرية
الطبية لدراسة السمنة..
والمنضم حديثا إلى فريق "بص وطل"
ليرد على أسئلة قرائنا الأعزاء
وهانرفع معاه شعار
"اخسر وزنك تكسب صحتك"..
مشكلتي إن حالتي النفسية مرتبطة دايماً بالأكل وخاصة لما بكون زعلانة أو في حالة غضب.. فوراً أحط همي في الأكل ومش أي أكل!!! الشيكولاتة طبعا تتصدر القائمة الطويلة من الممنوعات في عالم الريجيم حلويات ومخبوزات وأي حاجة تكون في طريقي.. ساعات باضحك على نفسي من طريقتي في الأكل وعلى الكميات الفظيعة اللي بتدخل معدتي من غير ما أكون جعانة....!!!!
أنا بجد في مشكلة وزني بيزيد وطبعاً الزعل والمشاكل عمرها ما هاتخلص وقبل ما أختم رسالتي عاوز أقول للدكتور إني بحب الشيكولاتة موووت ومش قادرة أبطل البيبسي..
ن.ع
إلى "ن.ع"... أرجو ألا تنظري إلى المشكلة من هذه الزاوية الضيقة أشعر في رسالتك بكثير من الانفعال.. تعالي نفكر ونتكلم بالعقل بعيداً عن العصبية ورفض الحلول الصعبة من "وجهة نظرك"... و عشان نتعرف على المشكلة...
في البداية مهم أن نتخلص من عادة أن الأكل وسيلة للتنفيس عن الغضب والشعور بالاكتئاب ونستبدل هذه العادة السيئة بالرياضة أي نوع رياضة مناسب لظروفنا والمتاح لنا.. أكيد الرياضة هتخفف من حدة أعبائنا النفسية.
أما بالنسبة لحب الشيكولاتة والحلويات بصورة تمنع مواصلة الريجيم فهي مشكلة حقيقية وممكن تؤدي إلى
ما يسمي بإدمان "الشيكولاتة"... لا ننكر أن الشيكولاتة فعلا تحتوي على مادة كيميائية تساعد على الهدوء النفسي وتحتوي على مواد مضادة للاكتئاب ولها علاقة بالحالة المزاجية ولكن مهما كانت الأسباب...!!!! الموضوع في النهاية ارتباط نفسي بالحلويات أو الشيكولاتة عامة.
وعشان نتغلب على المشكلة دي نبدأ واحدة واحدة يعني مانمنعش الشيكولاتة أو الحاجة الحلوة مرة واحدة الخطوة الأولى نقلل الكمية وبشكل تدريجي...
الخطوة التانية أبدل الشيكولاتة أو الحاجة اللي أنا بحبها بالبديل المتوافر منها بس "دايت" وحالياً متوفر في الأسواق البدائل الدايت سواء شيكولاته مربى. بسكويت... حلاوة.. وبالمناسبة هناك بحث حديث جداً ناقشه مؤتمر عن السمنة هذا العام أشار إلى أن تناول الشيكولاتة " dark " مسموح بها في الريجيم؛ لأنها تبعث على الإحساس بالشبع وسعراتها الحرارية أقل من الشيكولاتة العادية لكن مازالت الأبحاث تدرس هذا الموضوع .
ولابد من الأخذ في الاعتبار أن هذه البدائل تحتوي على سعرات حرارية وليست دايت 100% أو لا تسبب زيادة الوزن بالعكس ولكن نلجأ إليها لحل هذه المشكلة وإلى حد ما...
وبعد ما نصل إلى هذه المرحلة نبدأ في الاستغناء عنها تماما.. بمعنى لما أبدأ أسيطر على نفسي وأمشي في باقي الريجيم كويس أخلي الحلويات والشيكولاتة آخر حاجة لأن عملياً من الصعب أبدأ بأصعب حاجة أنا متعلق بها جدا... ومع الإرادة وتحقيق نتائج مرضية على الميزان هيتولد الحافز القوي للاستغناء عن الحلويات والشيكولاتة مع الوقت. هذه الطريقة تنطبق على الناس اللي بتحب السكر كتير في الشاي تتبع نفس الخطوات أو "مش قادرة تبطل البيبسي" زي مشكلتنا النهارده.
هل العصائر المتوفرة حالياً في الأسواق بدون سكر مفيدة في الريجيم؟ ويا ترى ممكن تكون بديل للفاكهة... هل فيه أنواع من الأكل بتحرق الدهون
محمد
العصير المسموح به في الريجيم هو العصير "الفريش" فقط المعصور في البيت...!! ونصف كوب فقط أيضاً وهو يوازي ثمرة فاكهة. ويفضل أكل الثمرة بدل عصرها؛ لأن الألياف الطبيعية في البرتقال مثلاً تساعد على زيادة معدل حرق السعرات؛ لأن الجسم بيبذل مجهود في هضمها.. العصير بيكون من غير ألياف، فالجسم بياخد السعرات كاملة.
العصير الممنوع في الريجيم هو "النكتر" أو العصير المحفوظ؛ لأن بيبقى مضاف عليه مواد أخرى، ولو كانت الإضافات بدون سكر فده معناه إنه غير مضاف إليه سكر لكن سكر الفاكهة "الفركتوز" مازال موجوداً.
فيه أنواع من الأكل فيها ألياف عالية جداً وسعرات قليلة جداً بتخلي الجسم يبذل مجهوداً في هضمها فيحرق سعرات حرارية أكتر من السعرات التي حصل عليها الشخص، ومن الحاجات الأساسية التي تحتوي سعرات سلبية ومن هذا النوع الخيار والكرنب.
نفسي أعرف عدد السعرات الحرارية المسموح بها في اليوم و عدد الكيلو جرامات المسموح بإنقاصها في الشهر.. الحد الآمن.. ولو الواحد مش بيحب السلطة والخضار وبيحب النشويات أكتر يعمل إيه؟.. ويا ترى فيه ريجيمات فيها نشويات فقط؟
كريم سعد
نظام السعرات الحرارية عبارة عن جداول طويلة مفصل بها كل أنواع الأكل والسعرات التي تحتوي عليها.. أما بالنسبة لتحديد السعرات، فيختلف من شخص لآخر حسب طبيعة المجهود، وحسب السن والجنس، الرجل غير المرأة، وطبيعة العمل. لازم تتوفر معلومات كاملة عن الحالة وطبيعة نشاطها لتحديد السعرات الحرارية المسموح بها في اليوم.. ولكن بشكل عام الرجال يحتاجون لسعرات حرارية من 2000 إلى 2500 سعر حراري في اليوم، والسيدات من 1500 إلى 2200 سعر حراري يومياً.. وعشان نخس كويس لازم يكون أكلنا يحتوي على 500 سعر حراري "أقل" من احتياجنا اليومي.
ممكن الشخص يخس في الشهر من 4 إلى 6 كيلو وهو ده المتوسط.. ممكن يزيد على كده شويه أو يقل مافيش مشكلة وده راجع إلى طبيعة الشخص وطبيعة حياته ونوعه يعني الرجل بيخس أسرع من المرأة. أصحاب الأوزان الثقيلة بيخسوا أسرع من أصحاب الوزن القليل؛ لأن الشخص اللي عنده زيادة مثلاً 30 كيلو كأنه شايل على ظهره شنطة طول الوقت بالوزن ده فمن الطبيعي إن معدل حرق السعرات يكون عنده أعلى من الشخص اللي كم الدهون في جسمه أقل..
أما بالنسبة لعدم الرغبة في أكل السلطة والفاكهة والاعتماد الكلي على النشويات واللحوم فالمشكلة دي لها علاقة بالإرادة وطبيعة الأكل اللي الإنسان اتربى واتعود عليه ونمط الحياة... طبعاً ده غلط لازم الأكل يكون متوازن وفيه كل العناصر الغذائية وحتى الريجيمات اللي بتمنع الدهون وتعتمد على النشويات فقط مضرة جداً وكمان الريجيمات المعتمدة على البروتينات فقط مضرة جداً؛ لأن الجسم بهذه الطريقة بيحرم من الأملاح والمعادن والفيتامينات المهمة. هذه الأنواع تغير من نسبة الأحماض في الدم، فتؤثر على وظائف الجسم.
موضوعات سابقة
:: هل يا ترى الرياضة ممكن تزوّد الوزن؟!!
:: أشعر بدوخة وعندي ألم في المعدة.. هل بسبب الريجيم؟!
:: ازاي أثبت وزني... ليه بارجع اتخن من الأول؟!!
:: جراحات السمنة:: أدوية الريجيم.. أرجوك لا تأخذ هذا الدواء.....!!!!
:: احسب وزنك بطريقة سهلة وقرر... "بس بسرعة"..!!
