موضوعات سابقة
ارسل الموضوع لصديقنها كامل
يا ترى نفسك تخسي..!! ومش عارفة تبدأي ازاي؟...!! أو مترددة وقلقانة تروحي لدكتور يحرمك من "الشيكولاتة" و"البيتزا" و"الشيبسي" و"البيبسي" وكل اللي نفسك فيه..!! وزنك زاد ومش عارفة تلبسي حاجة تناسب سنك..!! بتنهجي وانت ماشية أو لما تطلعي سلم..!! يا ترى جربتي أكتر من ريجيم والحكاية برضه مش نافعة..! يا ترى بعد عذاب الريجيم والحرمان رجعت "ريمة لعادتها القديمة" واللي خسيتيه في شهور رجعتيه وأكتر في أسبوعين..!!
أسئلة كتيرة ومشاكل أكتر بتواجهنا
لما بنقرر نعمل "ريجيم"..!
وعشان نبدأ "صح" و"بجد"
كان من المهم إننا نستضيف
الدكتور "محمد أبو الغيط"
الأستاذ بكلية الطب جامعة القاهرة
وسكرتير عام الجمعية المصرية
الطبية لدراسة السمنة..
والمنضم حديثا إلى فريق "بص وطل"
ليرد على أسئلة قرائنا الأعزاء
وهانرفع معاه شعار
"اخسر وزنك تكسب صحتك"..
من الحاجات التي تُشعر المرأة بالقلق ارتباط اضطراب الهرمونات والتغييرات الفسيولوجية بزيادة الوزن وخاصة في فترة الدورة الشهرية أو حتى بعد انقطاعها... تأكدنا في الحلقه السابقة أن الزواج والحمل والرضاعة لا علاقة لهم بزيادة الوزن لو نظمت المرأة أكلها وابتعدت عن العادات الخاطئة التي توارثناها وينصحنا بها الغير باستمرار ونواصل الكلام عن " هي والسمنة" ونسأل..
ما هي التغييرات الفسيولوجية التي تتسبب في زيادة الوزن؟
تعتبر فترة انقطاع الدورة الشهرية هي التغيير الفسيولوجي الذي يسبب زيادة في الوزن عند السيدات، وبالطبع مع ارتباطه بمجموعة من العادات الاجتماعية الخاطئة يزيد الوزن من 2 إلى 10 كيلو في هذه الفترة وتتوزع هذه الكيلوات في أماكن مختلفة من الجسم بطريقة تحوّل شكلها من أم إلى جدة...
من العوامل التي تساعد على زيادة الوزن في هذه الفترة قلة الحركة، فهي ممكن أن تكون في هذه المرحلة أصبحت في تدرج وظيفي أعلى وأصبحت تقضي أغلب وقتها في الشغل خلف مكتبها أو أولادها كبروا وبطلت تجري وراهم أو الزوج أصبح ميسور الحال، ولم يعد هناك حاجة لخروجها للعمل، فتحول أغلب وقتها إلى الفرجة على التليفزيون...
بالإضافة إلى الشعور المتزايد بالاكتئاب، وهو طبيعي في هذه المرحلة السنية، مما يجعلها أكثر رغبة في تناول الحلويات والشيكولاتات التي تعدل من الحالة المزاجية نوعاً ما، طبعاً بالإضافة إلى قلة ممارسة الرياضة وغيرها من الأمثلة التي تساعد على زيادة الوزن في الفترة التي تحتاج فيها المرأة إلى الحركة؛ لمقاومة السمنة المرتبطة بالتقدم في السن.
هل صحيح أن الوزن يزيد مع اقتراب الدورة الشهرية؟
يصاحب الدورة الشهرية تغييرات فسيولوجية تسبب زيادة في الوزن، ولكن الزيادة هنا مجرد احتفاظ الجسم بالمية مش الدهون..
يبدأ الجسم يحوّش المية قبل بداية الدورة بأسبوع، لكن بمجرد نزول الدورة يتخلص الجسم تدريجياً منها مع بداية اليوم الأول وحتى الثالث... تجمع المية بين خلايا الجسم مش سمنة ولكنها بتوزن على الميزان من كيلو إلى ثلاث كيلوات عشان كده نصيحتي لكل واحدة ماشية على نظام تثبيت للوزن ولقت وزنها زايد كيلو أو حتى اتنين أو أكتر قبل الدورة ما تعملش ريجيم... تنتظر انتهاء الدورة أكيد هتلاقي الكيلوات الزايدة على الميزان اختفت.
وجود المية في الجسم مش معناه سمنة؛ لأن السمنة هي الدهون... عشان كده الريجيم اللي بيعتمد على فقدان المية من الجسم مش ريجيم حقيقي والوزن بيرجع تاني مع استراد السوائل اللي الجسم فقدها...
كمان وجود خلايا المية في الجسم وضغطها على المخ بيخلي السيدات والبنات في حالة مزاجية سيئة أو ممكن يكونوا عصبيين شوية أثناء الدورة الشهرية.
كمان لو واحدة بتعمل ريجيم وقبل الدورة بيوم وزنت نفسها وماكانتش خسّت ماتقلقش الأسبوع اللي بعده لما هتوزن نفسها هتلاقي الميزان نزل الضعف وهيعوض الأسبوع اللي قبل الدورة.
موضوعات سابقة
:: بحب الشيكولاته موووت ومش قادرة أبطل البيبسي!
:: هل يا ترى الرياضة ممكن تزوّد الوزن؟!!
:: أشعر بدوخة وعندي ألم في المعدة.. هل بسبب الريجيم؟!
:: ازاي أثبت وزني... ليه بارجع اتخن من الأول؟!!
:: جراحات السمنة:: أدوية الريجيم.. أرجوك لا تأخذ هذا الدواء.....!!!!
:: احسب وزنك بطريقة سهلة وقرر... "بس بسرعة"..!!
